Textus Receptus Bibles
Masoretic Text 1524
Old Testament
| 119:1 | אשׁרי תמימי דרך ההלכים בתורת יהוה׃ |
| 119:2 | אשׁרי נצרי עדתיו בכל לב ידרשׁוהו׃ |
| 119:3 | אף לא פעלו עולה בדרכיו הלכו׃ |
| 119:4 | אתה צויתה פקדיך לשׁמר מאד׃ |
| 119:5 | אחלי יכנו דרכי לשׁמר חקיך׃ |
| 119:6 | אז לא אבושׁ בהביטי אל כל מצותיך׃ |
| 119:7 | אודך בישׁר לבב בלמדי משׁפטי צדקך׃ |
| 119:8 | את חקיך אשׁמר אל תעזבני עד מאד׃ |
| 119:9 | במה יזכה נער את ארחו לשׁמר כדברך׃ |
| 119:10 | בכל לבי דרשׁתיך אל תשׁגני ממצותיך׃ |
| 119:11 | בלבי צפנתי אמרתך למען לא אחטא׃ |
| 119:12 | ברוך אתה יהוה למדני חקיך׃ |
| 119:13 | בשׂפתי ספרתי כל משׁפטי פיך׃ |
| 119:14 | בדרך עדותיך שׂשׂתי כעל כל הון׃ |
| 119:15 | בפקדיך אשׂיחה ואביטה ארחתיך׃ |
| 119:16 | בחקתיך אשׁתעשׁע לא אשׁכח דברך׃ |
| 119:17 | גמל על עבדך אחיה ואשׁמרה דברך׃ |
| 119:18 | גל עיני ואביטה נפלאות מתורתך׃ |
| 119:19 | גר אנכי בארץ אל תסתר ממני מצותיך׃ |
| 119:20 | גרסה נפשׁי לתאבה אל משׁפטיך בכל עת׃ |
| 119:21 | גערת זדים ארורים השׁגים ממצותיך׃ |
| 119:22 | גל מעלי חרפה ובוז כי עדתיך נצרתי׃ |
| 119:23 | גם ישׁבו שׂרים בי נדברו עבדך ישׂיח בחקיך׃ |
| 119:24 | גם עדתיך שׁעשׁעי אנשׁי עצתי׃ |
| 119:25 | דבקה לעפר נפשׁי חיני כדברך׃ |
| 119:26 | דרכי ספרתי ותענני למדני חקיך׃ |
| 119:27 | דרך פקודיך הבינני ואשׂיחה בנפלאותיך׃ |
| 119:28 | דלפה נפשׁי מתוגה קימני כדברך׃ |
| 119:29 | דרך שׁקר הסר ממני ותורתך חנני׃ |
| 119:30 | דרך אמונה בחרתי משׁפטיך שׁויתי׃ |
| 119:31 | דבקתי בעדותיך יהוה אל תבישׁני׃ |
| 119:32 | דרך מצותיך ארוץ כי תרחיב לבי׃ |
| 119:33 | הורני יהוה דרך חקיך ואצרנה עקב׃ |
| 119:34 | הבינני ואצרה תורתך ואשׁמרנה בכל לב׃ |
| 119:35 | הדריכני בנתיב מצותיך כי בו חפצתי׃ |
| 119:36 | הט לבי אל עדותיך ואל אל בצע׃ |
| 119:37 | העבר עיני מראות שׁוא בדרכך חיני׃ |
| 119:38 | הקם לעבדך אמרתך אשׁר ליראתך׃ |
| 119:39 | העבר חרפתי אשׁר יגרתי כי משׁפטיך טובים׃ |
| 119:40 | הנה תאבתי לפקדיך בצדקתך חיני׃ |
| 119:41 | ויבאני חסדך יהוה תשׁועתך כאמרתך׃ |
| 119:42 | ואענה חרפי דבר כי בטחתי בדברך׃ |
| 119:43 | ואל תצל מפי דבר אמת עד מאד כי למשׁפטך יחלתי׃ |
| 119:44 | ואשׁמרה תורתך תמיד לעולם ועד׃ |
| 119:45 | ואתהלכה ברחבה כי פקדיך דרשׁתי׃ |
| 119:46 | ואדברה בעדתיך נגד מלכים ולא אבושׁ׃ |
| 119:47 | ואשׁתעשׁע במצותיך אשׁר אהבתי׃ |
| 119:48 | ואשׂא כפי אל מצותיך אשׁר אהבתי ואשׂיחה בחקיך׃ |
| 119:49 | זכר דבר לעבדך על אשׁר יחלתני׃ |
| 119:50 | זאת נחמתי בעניי כי אמרתך חיתני׃ |
| 119:51 | זדים הליצני עד מאד מתורתך לא נטיתי׃ |
| 119:52 | זכרתי משׁפטיך מעולם יהוה ואתנחם׃ |
| 119:53 | זלעפה אחזתני מרשׁעים עזבי תורתך׃ |
| 119:54 | זמרות היו לי חקיך בבית מגורי׃ |
| 119:55 | זכרתי בלילה שׁמך יהוה ואשׁמרה תורתך׃ |
| 119:56 | זאת היתה לי כי פקדיך נצרתי׃ |
| 119:57 | חלקי יהוה אמרתי לשׁמר דבריך׃ |
| 119:58 | חליתי פניך בכל לב חנני כאמרתך׃ |
| 119:59 | חשׁבתי דרכי ואשׁיבה רגלי אל עדתיך׃ |
| 119:60 | חשׁתי ולא התמהמהתי לשׁמר מצותיך׃ |
| 119:61 | חבלי רשׁעים עודני תורתך לא שׁכחתי׃ |
| 119:62 | חצות לילה אקום להודות לך על משׁפטי צדקך׃ |
| 119:63 | חבר אני לכל אשׁר יראוך ולשׁמרי פקודיך׃ |
| 119:64 | חסדך יהוה מלאה הארץ חקיך למדני׃ |
| 119:65 | טוב עשׂית עם עבדך יהוה כדברך׃ |
| 119:66 | טוב טעם ודעת למדני כי במצותיך האמנתי׃ |
| 119:67 | טרם אענה אני שׁגג ועתה אמרתך שׁמרתי׃ |
| 119:68 | טוב אתה ומטיב למדני חקיך׃ |
| 119:69 | טפלו עלי שׁקר זדים אני בכל לב אצר פקודיך׃ |
| 119:70 | טפשׁ כחלב לבם אני תורתך שׁעשׁעתי׃ |
| 119:71 | טוב לי כי עניתי למען אלמד חקיך׃ |
| 119:72 | טוב לי תורת פיך מאלפי זהב וכסף׃ |
| 119:73 | ידיך עשׂוני ויכוננוני הבינני ואלמדה מצותיך׃ |
| 119:74 | יראיך יראוני וישׂמחו כי לדברך יחלתי׃ |
| 119:75 | ידעתי יהוה כי צדק משׁפטיך ואמונה עניתני׃ |
| 119:76 | יהי נא חסדך לנחמני כאמרתך לעבדך׃ |
| 119:77 | יבאוני רחמיך ואחיה כי תורתך שׁעשׁעי׃ |
| 119:78 | יבשׁו זדים כי שׁקר עותוני אני אשׂיח בפקודיך׃ |
| 119:79 | ישׁובו לי יראיך וידעו עדתיך׃ |
| 119:80 | יהי לבי תמים בחקיך למען לא אבושׁ׃ |
| 119:81 | כלתה לתשׁועתך נפשׁי לדברך יחלתי׃ |
| 119:82 | כלו עיני לאמרתך לאמר מתי תנחמני׃ |
| 119:83 | כי הייתי כנאד בקיטור חקיך לא שׁכחתי׃ |
| 119:84 | כמה ימי עבדך מתי תעשׂה ברדפי משׁפט׃ |
| 119:85 | כרו לי זדים שׁיחות אשׁר לא כתורתך׃ |
| 119:86 | כל מצותיך אמונה שׁקר רדפוני עזרני׃ |
| 119:87 | כמעט כלוני בארץ ואני לא עזבתי פקודיך׃ |
| 119:88 | כחסדך חיני ואשׁמרה עדות פיך׃ |
| 119:89 | לעולם יהוה דברך נצב בשׁמים׃ |
| 119:90 | לדר ודר אמונתך כוננת ארץ ותעמד׃ |
| 119:91 | למשׁפטיך עמדו היום כי הכל עבדיך׃ |
| 119:92 | לולי תורתך שׁעשׁעי אז אבדתי בעניי׃ |
| 119:93 | לעולם לא אשׁכח פקודיך כי בם חייתני׃ |
| 119:94 | לך אני הושׁיעני כי פקודיך דרשׁתי׃ |
| 119:95 | לי קוו רשׁעים לאבדני עדתיך אתבונן׃ |
| 119:96 | לכל תכלה ראיתי קץ רחבה מצותך מאד׃ |
| 119:97 | מה אהבתי תורתך כל היום היא שׂיחתי׃ |
| 119:98 | מאיבי תחכמני מצותך כי לעולם היא׃ |
| 119:99 | מכל מלמדי השׂכלתי כי עדותיך שׂיחה׃ |
| 119:100 | מזקנים אתבונן כי פקודיך נצרתי׃ |
| 119:101 | מכל ארח רע כלאתי רגלי למען אשׁמר דברך׃ |
| 119:102 | ממשׁפטיך לא סרתי כי אתה הורתני׃ |
| 119:103 | מה נמלצו לחכי אמרתך מדבשׁ לפי׃ |
| 119:104 | מפקודיך אתבונן על כן שׂנאתי כל ארח שׁקר׃ |
| 119:105 | נר לרגלי דברך ואור לנתיבתי׃ |
| 119:106 | נשׁבעתי ואקימה לשׁמר משׁפטי צדקך׃ |
| 119:107 | נעניתי עד מאד יהוה חיני כדברך׃ |
| 119:108 | נדבות פי רצה נא יהוה ומשׁפטיך למדני׃ |
| 119:109 | נפשׁי בכפי תמיד ותורתך לא שׁכחתי׃ |
| 119:110 | נתנו רשׁעים פח לי ומפקודיך לא תעיתי׃ |
| 119:111 | נחלתי עדותיך לעולם כי שׂשׂון לבי המה׃ |
| 119:112 | נטיתי לבי לעשׂות חקיך לעולם עקב׃ |
| 119:113 | סעפים שׂנאתי ותורתך אהבתי׃ |
| 119:114 | סתרי ומגני אתה לדברך יחלתי׃ |
| 119:115 | סורו ממני מרעים ואצרה מצות אלהי׃ |
| 119:116 | סמכני כאמרתך ואחיה ואל תבישׁני משׂברי׃ |
| 119:117 | סעדני ואושׁעה ואשׁעה בחקיך תמיד׃ |
| 119:118 | סלית כל שׁוגים מחקיך כי שׁקר תרמיתם׃ |
| 119:119 | סגים השׁבת כל רשׁעי ארץ לכן אהבתי עדתיך׃ |
| 119:120 | סמר מפחדך בשׂרי וממשׁפטיך יראתי׃ |
| 119:121 | עשׂיתי משׁפט וצדק בל תניחני לעשׁקי׃ |
| 119:122 | ערב עבדך לטוב אל יעשׁקני זדים׃ |
| 119:123 | עיני כלו לישׁועתך ולאמרת צדקך׃ |
| 119:124 | עשׂה עם עבדך כחסדך וחקיך למדני׃ |
| 119:125 | עבדך אני הבינני ואדעה עדתיך׃ |
| 119:126 | עת לעשׂות ליהוה הפרו תורתך׃ |
| 119:127 | על כן אהבתי מצותיך מזהב ומפז׃ |
| 119:128 | על כן כל פקודי כל ישׁרתי כל ארח שׁקר שׂנאתי׃ |
| 119:129 | פלאות עדותיך על כן נצרתם נפשׁי׃ |
| 119:130 | פתח דבריך יאיר מבין פתיים׃ |
| 119:131 | פי פערתי ואשׁאפה כי למצותיך יאבתי׃ |
| 119:132 | פנה אלי וחנני כמשׁפט לאהבי שׁמך׃ |
| 119:133 | פעמי הכן באמרתך ואל תשׁלט בי כל און׃ |
| 119:134 | פדני מעשׁק אדם ואשׁמרה פקודיך׃ |
| 119:135 | פניך האר בעבדך ולמדני את חקיך׃ |
| 119:136 | פלגי מים ירדו עיני על לא שׁמרו תורתך׃ |
| 119:137 | צדיק אתה יהוה וישׁר משׁפטיך׃ |
| 119:138 | צוית צדק עדתיך ואמונה מאד׃ |
| 119:139 | צמתתני קנאתי כי שׁכחו דבריך צרי׃ |
| 119:140 | צרופה אמרתך מאד ועבדך אהבה׃ |
| 119:141 | צעיר אנכי ונבזה פקדיך לא שׁכחתי׃ |
| 119:142 | צדקתך צדק לעולם ותורתך אמת׃ |
| 119:143 | צר ומצוק מצאוני מצותיך שׁעשׁעי׃ |
| 119:144 | צדק עדותיך לעולם הבינני ואחיה׃ |
| 119:145 | קראתי בכל לב ענני יהוה חקיך אצרה׃ |
| 119:146 | קראתיך הושׁיעני ואשׁמרה עדתיך׃ |
| 119:147 | קדמתי בנשׁף ואשׁועה לדבריך יחלתי׃ |
| 119:148 | קדמו עיני אשׁמרות לשׂיח באמרתך׃ |
| 119:149 | קולי שׁמעה כחסדך יהוה כמשׁפטך חיני׃ |
| 119:150 | קרבו רדפי זמה מתורתך רחקו׃ |
| 119:151 | קרוב אתה יהוה וכל מצותיך אמת׃ |
| 119:152 | קדם ידעתי מעדתיך כי לעולם יסדתם׃ |
| 119:153 | ראה עניי וחלצני כי תורתך לא שׁכחתי׃ |
| 119:154 | ריבה ריבי וגאלני לאמרתך חיני׃ |
| 119:155 | רחוק מרשׁעים ישׁועה כי חקיך לא דרשׁו׃ |
| 119:156 | רחמיך רבים יהוה כמשׁפטיך חיני׃ |
| 119:157 | רבים רדפי וצרי מעדותיך לא נטיתי׃ |
| 119:158 | ראיתי בגדים ואתקוטטה אשׁר אמרתך לא שׁמרו׃ |
| 119:159 | ראה כי פקודיך אהבתי יהוה כחסדך חיני׃ |
| 119:160 | ראשׁ דברך אמת ולעולם כל משׁפט צדקך׃ |
| 119:161 | שׂרים רדפוני חנם ומדבריך פחד לבי׃ |
| 119:162 | שׂשׂ אנכי על אמרתך כמוצא שׁלל רב׃ |
| 119:163 | שׁקר שׂנאתי ואתעבה תורתך אהבתי׃ |
| 119:164 | שׁבע ביום הללתיך על משׁפטי צדקך׃ |
| 119:165 | שׁלום רב לאהבי תורתך ואין למו מכשׁול׃ |
| 119:166 | שׂברתי לישׁועתך יהוה ומצותיך עשׂיתי׃ |
| 119:167 | שׁמרה נפשׁי עדתיך ואהבם מאד׃ |
| 119:168 | שׁמרתי פקודיך ועדתיך כי כל דרכי נגדך׃ |
| 119:169 | תקרב רנתי לפניך יהוה כדברך הבינני׃ |
| 119:170 | תבוא תחנתי לפניך כאמרתך הצילני׃ |
| 119:171 | תבענה שׂפתי תהלה כי תלמדני חקיך׃ |
| 119:172 | תען לשׁוני אמרתך כי כל מצותיך צדק׃ |
| 119:173 | תהי ידך לעזרני כי פקודיך בחרתי׃ |
| 119:174 | תאבתי לישׁועתך יהוה ותורתך שׁעשׁעי׃ |
| 119:175 | תחי נפשׁי ותהללך ומשׁפטך יעזרני׃ |
| 119:176 | תעיתי כשׂה אבד בקשׁ עבדך כי מצותיך לא שׁכחתי׃ |
Masoretic Text 1524
The Hebrew text of the Old Testament is called the Masoretic Text because in its present form it is based upon the Masora—the Hebrew, textual tradition of the Jewish scholars known as the Masoretes (or Masorites). The Masoretes were rabbis who made it their special work to correct the faults that had crept into the text of the Old Testament during the Babylonian captivity, and to prevent, for the future, its being corrupted by any alteration. They first separated the apocryphal from the canonical books, and divided the latter into twenty-two books, being the number of letters in the Hebrew alphabet. Then they divided each book into sections and verses.
There is a great difference of opinion as to when the Masoretic Text was written, but it was probably accomplished in the 10th -11th century. Several editions existed, varying considerably, but the received and authoritative text is that of Jacob ben-chayim ibn Adonijah, who carefully sifted and arranged the previous works on the subject. It was published in 1524.